Xa está aberta a convocatoria de axudas 2026 destinada a apoiar proxectos que contribúan ao desenvolvemento sostible do sector pesqueiro e á dinamización económica e social das comunidades costeiras do seu ámbito territorial. Estas subvencións enmárcanse na Estratexia de Desenvolvemento Local Participativo (EDLP) do GALP Golfo Ártabro Sur e teñen como obxectivo impulsar iniciativas vinculadas á innovación, á diversificación da actividade e á posta en valor dos recursos mariños e costeiros.
A convocatoria está dirixida a pequenas e medianas empresas, persoas autónomas, entidades sen ánimo de lucro, confrarías e entidades públicas locais que desexen poñer en marcha proxectos viables e aliñados cos obxectivos estratéxicos do GALP. O ámbito territorial abrangue os concellos de A Coruña, Arteixo, Bergondo, Cambre, Culleredo, Oleiros e Sada.
O prazo de presentación de solicitudes remata o luns 16 de febreiro, polo que desde o GALP Golfo Ártabro Sur animamos ás persoas e entidades interesadas a informarse e preparar a súa solicitude con tempo.
Toda a información sobre a convocatoria, xunto coa documentación necesaria, os modelos descargables e as indicacións para cubrir os formularios e presentar a solicitude, pode consultarse na web do GALP Golfo Ártabro Sur: www.galpartabrosur.com.Desde o GALP Golfo Ártabro Sur convídase ás persoas promotoras a achegarse ás oficinas do grupo ou contactar co equipo técnico, que ofrece asesoramento e acompañamento para resolver dúbidas e facilitar a presentación de proxectos que contribúan ao futuro do sector pesqueiro e das comunidades costeiras.
Comentarios recientes