A economía circular e a innovación únense no proxecto Blue Shell, unha iniciativa promovida por Blue Marine Oil, S.L. e apoiada polo GALP Golfo Ártabro Sur, que busca transformar un residuo xerado pola actividade pesqueira e marisqueira nun produto de alto valor engadido para a industria.
O proxecto ten como obxectivo estudar a viabilidade do escalado industrial dun proceso que permita converter as cunchas de moluscos bivalvos, consideradas habitualmente un subproduto, en sales orgánicas de calcio certificadas para a súa comercialización. Ademais do desenvolvemento do estudo técnico, a iniciativa contempla a adquisición de equipamento de laboratorio necesario para avanzar na investigación e validación do proceso.
As cunchas de mexillón, ameixa, ostra ou vieira están compostas maioritariamente por carbonato cálcico, un material cun elevado potencial para a súa reutilización. Con Blue Shell preténdese dar un novo uso a este recurso, contribuíndo a reducir residuos e favorecendo un modelo produtivo máis sostible, aliñado cos principios da economía circular.
Este tipo de iniciativas representan unha oportunidade para impulsar novas liñas de negocio vinculadas ao sector pesqueiro e á bioeconomía azul, apostando pola innovación e pola valorización de recursos que ata agora tiñan un escaso aproveitamento económico.
O proxecto enmárcase na Estratexia de Desenvolvemento Local Participativo (EDLP) do GALP Golfo Ártabro Sur e está financiado a través do Fondo Europeo Marítimo, de Pesca e de Acuicultura (FEMPA) 2021-2027. Conta cun investimento subvencionable de 33.266,76 euros, cunha intensidade de axuda pública do 35 %.
Con Blue Shell, o GALP Golfo Ártabro Sur continúa apoiando proxectos que fomentan a innovación, a sustentabilidade e a creación de valor arredor dos recursos mariños, promovendo solucións que contribúan ao desenvolvemento dunha economía costeira máis competitiva e respectuosa co medio ambiente.
Comentarios recientes