Principais obxectivos do proxecto:

O obxectivo xeral do proxecto foi identificar e promover novas oportunidades de creación de emprego apostando por un modelo de turismo sostible (Ecoturismo). A posta en marcha deste modelo turístico favoreceu o crecemento económico e a creación de emprego nos concellos costeiros, con maior vocación mariñeira. O turismo exerceu de motor do resto de actividades económicas (sector produtor e transformador, aloxamentos, servizos, etc.).

Os obxectivos específicos foron:

• Poñer en valor o patrimonio do mar e do litoral a través de novos produtos turísticos.
• Articular unha oferta turística baseada no patrimonio e nos recursos do mar e do litoral, buscando a desestacionalización e os novos públicos.
• Promover a cooperación entre o sector do mar, o sector do turismo e a hostalería, as administracións locais e o resto do tecido produtivo, forxando alianzas duradeiras cara a un futuro.

Resultados concretos previstos coa implementación do proxecto:

Os principais resultados previstos foron os seguintes:

• Promover a creación de emprego e a posta en marcha de novas actividades económicas entre a comunidade costeira, ligadas ao turismo sostible.
• Diversificar as actividades realizadas no marco da pesca, como foron as iniciativas de turismo mariñeiro.
• Empregar as novas tecnoloxías para dar a coñecer os recursos do mar e do litoral no ámbito territorial do GALP Golfo Ártabro Sur.
• Implicar ao sector do turismo e a hostalería na posta en valor e difusión dos recursos mariños e de litoral, no ámbito do GALP Golfo Ártabro Sur.

Principais actividades do proxecto:

Entre as actividades programadas estiveron as de xerar un Grupo de Traballo de empresas do mar e turísticas, así como de entidades locais e outros axentes de interese, que definisen novos produtos turísticos vinculados co litoral, a costa e o mar dos concellos do GALP Golfo Ártabro Sur.

Definíronse, como mínimo, tres produtos ecoturísticos no Golfo Ártabro, interconectados entre si, e capacitouse ao empresariado relacionado con estes produtos co obxectivo de coñecer as bases do Ecoturismo e interconectar distintas actividades sectorialmente.

Dinamizouse o proxecto a través das redes sociais, mediante persoal propio, e elaboráronse distintos materiais promocionais para o lanzamento destes produtos, incluíndo unha visita de familiarización por parte dos axentes de interese.

Este proxecto tamén pivotou na mellora da comercialización e promoción dos produtos do mar e o litoral, principalmente nas canles cortes (restaurantes que consumiron produto local), conectando estes produtos coa demanda existente na Reserva da Biosfera Mariñas Coruñesas e Terras do Mandeo, así como na cidade da Coruña.

En definitiva, tratouse de articular un destino Ecoturístico con produtos turísticos vinculados co mar e co litoral, e posicionándoo como un destino de Ecoturismo a nivel estatal.