O GALP Golfo Ártabro Sur foi distinguido co recoñecemento ao mellor proxecto de boas prácticas na VII edición dos premios entregados no marco do catálogo de peche do período FEMP 2014–2020, durante a Sesión Plenaria da Rede Española de Grupos de Pesca (REGP) celebrada en Tenerife entre o 12 e o 14 de maio.
O galardón recoñece o proxecto “Exposición de mobiliario de formigón reciclado producido con cáscara de mexilón”, unha proposta innovadora desenvolvida pola empresa galega Construccións M.A. Ramos, que aposta pola economía circular e a valorización de residuos mariños para crear mobiliario sostible.
A encargada de recoller o premio foi Amparo Dopico, técnico do GALP Golfo Ártabro Sur, da man do Ilustrísimo Don Valentín Esteban González Évora, Conselleiro Delegado de Sector Primario e Benestar Animal, que puxo en valor a creatividade e o compromiso dos GALP co futuro das comunidades costeiras.
O proxecto premiado destaca pola súa aposta pola economía circular e a sustentabilidade ambiental, convertendo un residuo mariño como a cáscara de mexilón nun material útil para a creación de mobiliario urbano en formigón reciclado. Esta solución innovadora contribúe á redución de residuos, ao aproveitamento responsable dos recursos mariños locais e á promoción de prácticas construtivas máis sostibles.
A sesión plenaria, organizada pola Dirección Xeral de Ordenación Pesqueira e Acuicultura da Secretaría Xeral de Pesca (MAPA), contou co apoio do Goberno de Canarias e coa participación de Grupos de Acción Local de toda España. O GALP de Tenerife actuou como anfitrión nesta edición, centrada na posta en común de experiencias e innovacións no marco do desenvolvemento local participativo.
Este recoñecemento reforza a misión do GALP Golfo Ártabro Sur, que traballa activamente no impulso de proxectos que promovan o desenvolvemento sostible, a protección do medio mariño e a dinamización da economía local. A través de iniciativas como esta, o GALP contribúe a valorizar os recursos naturais do Golfo Ártabro e a mellorar a calidade de vida das súas comunidades costeiras.
Comentarios recientes